2011 წლის მაისში რუსთავი 2-ზე დაიწყო ახალი იუმორისტული გადაცემა «თქვენი შოუ», რომელსაც წარმოგვიდგენს შემოქმედებითი ჯგუფი «კომედი გრუპი». პროექტის ავტორია გიორგი აფციაური.
ეს გახლავთ გადაცემა, სადაც ბევრი ახალი სახე მონაწილეობს. იგი მოიცავს სხვადასხვა ჟანრის იუმორისტულ, მუსიკალურ და ქორეოგრაფიულ ნომრებს, მონოლოგებს, წარმოგვიდგენს ცნობილ ადამიანებს განსხვავებულ ამპლუასა და სკეტჩში, მინისცენებს და გადაცემის წაყვანის ორიგინალურ ფორმას.
ეთერში გასვლის შემდეგ ახალმა სახეებმა დიდი მოწონება დაიმსახურეს ხალხში, რამაც განაპირობა გადაცემის პოპულარობა.
გარდა იმისა, რომ გადაცემა გამოირჩევა მრავალფეროვანი იუმორისტული ნომრებით, დროის გარკვეული ინტერვალის შემდეგ ტარდება მაყურებელთა გამოკითხვა: რა მოსწონთ გადაცემაში და რა არ მოსწონთ. გადაცემის შემქმნელები ითვალისწინებენ გამოკითხვის შედეგებს, რომელიც ტარდება სტუდენტებსა და უფროს თაობაში, რაც იმას ნიშნავს, რომ გადაცემა ყველა თაობის წარმომადგენლისთვის არის გათვალისწინებული.